Muzoraba – bu foydani taqsimlashga asoslangan moliyalashtirish xizmati bo‘lib, mikromoliya tashkiloti tomonidan mijozning tegishli arizasi asosida taqdim etiladi.
Foydani taqsimlash bo'yicha moliyaviy xizmat ko'rsatish shartnomasi shartlari bajarilishini ta'minlash maqsadida mikromoliya tashkiloti mijozdan qonun hujjatlarida belgilangan tartibda ta'minot talab qilishi mumkin. Agar mikromoliya tashkiloti mijozning vijdonsiz xatti-harakatlari (harakatsizligi) natijasida zarar ko'rsa, ushbu zararni garov evaziga qoplashi mumkin.
Agar mikromoliya tashkiloti tomonidan foydani taqsimlash asosida moliyalashtirish xizmatini ko'rsatish maqsadida kapital mijozga moddiy aktivlar shaklida taqdim etilsa, ushbu moddiy aktivlarning qiymati aniq ko'rsatilishi kerak.
Mikromoliya tashkiloti va mijoz o'rtasida tomonlarning kelishuvi bo'yicha tuzilgan shartnoma tugaganda yoki muddatidan oldin bekor qilinganda, agar foydada ishtirok etish asosida moliyalashtirish xizmati doirasida olingan jami daromad summasi umumiy xarajatlar summasiga teng bo'lsa investitsiya qilingan kapital (mablag' lar) mikromoliya tashkilotiga qaytariladi.
Mikromoliya tashkiloti foydada ishtirok etish asosida moliyalashtirish xizmatini ko'rsatish doirasida zarar ko'rgan taqdirda, mijozdan ushbu zararni undirishga yo'l qo'yilmaydi, mijozning o'z majburiyatlarini bajarishda vijdonsiz harakatlari (harakatsizligi) natijasida yetkazilgan zarar bundan mustasno.
Agar mijoz foydani taqsimlash asosida moliyalashtirish xizmati doirasida tuzilgan shartnoma shartlarini bajarishni boshlagan bo'lsa yoki ushbu shartnomaning amal qilish muddati hali tugamagan bo'lsa, ushbu shartnoma mikromoliya tashkiloti tomonidan bir tomonlama bekor qilinishi mumkin emas, shartnoma shartlarida nazarda tutilgan hollar bundan mustasno.
